اسلام آباد: میانمار کے سفیر کی دفتر خارجہ طلبی، روہنگیا مسلمانوں کے قتل عام اور ظالمانہ کارروائیوں پر شدید احتجاج۔ سیکرٹری خارجہ تہمینہ جنجوعہ نے آج میانمار کے سفیر یوون منٹ کو دفتر خارجہ طلب کرکے روہنگیا کے قتل عام پر گہری تشویش کا اظہار کرتے ہوئے پاکستانی حکومت اور قوم کی طرف سے شدید احتجاج کیا۔ سیکرٹری خارجہ نے میانمار کی حکومت سے مطالبہ کیا کہ ریاست آرا کان میں روہنگیا مسلمانوں کے خلاف تشدد کے اقدامات روکنے کے لیے فوری اقدامات کیے جائیں۔
انہوں نے برمی سفیر سے کہا کہ میانمار میں مسلمانوں کو جان و مال کا تحفظ فراہم کیا جائے اور مسلمان آبادی پر تشدد اور قتل عام کے خطرناک مسئلے کے حل کے لیے اقوام متحدہ کی سفارشات پر عمل کیا جائے۔ تہمینہ جنجوعہ نے سفیر پر زور دیا کہ برمی حکومت مسلم اقلیت کے خلاف گھناؤنے جرائم میں ملوث افراد کو فوری طور پر انصاف کے کٹہرے میں لانے کےلیے غیر جانبدارانہ تحقیقات کرائے۔ میانمار کے سفیر نے اپنی حکومت کو پاکستان کے تحفظات اور خدشات سے آگاہ کرنے کی یقین دہانی کرائی۔
Load/Hide Comments