پی ٹی آئی وفاق اور پنجاب میں حکومت سازی کی پوزیشن میں آ گئی: ترجمان

اسلام آباد(ایس این این ) تحریک انصاف کے ترجمان فواد چوہدری نے کہا کہ تحریک انصاف وفاق اور صوبے میں حکومت بنانے کے لیے درکار نشستیں حاصل کرچکی ہے، مسلم لیگ (ق) کے وفد نے عمران خان سے ملاقات کی ہے، فیصلہ کیا گیا ہے کہ (ق) لیگ وفاق اور پنجاب میں پی ٹی آئی کے ساتھ حکومتی اتحاد کا حصہ ہوگی ان کے ساتھ حکومتی اتحاد کا فارمولا تشکیل پاگیا ہے۔فواد چوہدری نے بتایا کہ جہانگیر ترین جلد کراچی روانہ ہوں گے اور ایم کیو ایم سے ملاقات کرکے ان کی 6 نشستوں کی حمایت حاصل کریں گے تاہم ہمیں درکار نشستیں پوری ہوگئی ہیں، قومی اسمبلی کے لیے پی ٹی آئی کا اپنا حصہ 144 نشستوں کا ہے، ق لیگ کی 4، ایم کیو ایم کی 6، بی این پی کی 2، جی ڈی اے کی 2 نشستوں کے امیدوار سمیت قومی اسمبلی کے 7 آزاد امیدوار ہمارے ساتھ شامل ہوچکے ہیں اور اس وقت ہم نیشنل اسمبلی کی 168 نشستوں کو چھو رہے ہیں اور ہم واضح اکثریت حاصل کرچکے ہیں۔رہنما پی ٹی آئی نے بتایا کہ پنجاب میں 360 نشستوں پر الیکشن ہوئے، اس ایوان میں سے ہمارے پاس 180 نشستیں پہنچ چکی ہیں جن میں خواتین اور آزاد امیدوار اور الائنس شامل ہیں چنانچہ ہم وفاق اور پنجاب میں حکومت بنانے کی پوزیشن میں ہیں، اسی طرح بلوچستان میں ہم مخلوط حکومت میں ہوں گے جس کے لیے مذاکرات جاری ہیں جب کہ خیبر پختون خوا میں ہماری پہلے ہی دو تہائی اکثریت ہے۔ایک سوال کے جواب میں فواد چوہدری نے کہا کہ خیبر پختون خوا اور پنجاب کے وزرائے اعلیٰ کا فیصلہ عمران خان کریں گے، تمام الائنس کو حکومت میں حصہ دیں گے، بقیہ رہ جانے والے چند آزاد امیدوار بھی جلد تحریک انصاف میں شامل ہوجائیں گے۔

اپنا تبصرہ بھیجیں