اسلام آباد(ایس این این) سابق وزیرداخلہ چوہدری نثار نے کہا ہے کہ مسلم لیگ کی حکومت میں ختم نبوت کا مسئلہ اور اب ملک دشمنی کے الزامات انتہائی تشویش ناک ہیں۔ذرائع کے مطابق مسلم لیگ (ن) کے رہنما چوہدری نثار علی خان نے کہا ہے کہ پارٹی میں موجودہ صورتحال پر موثر حکمت عملی کی ضرورت ہے. رد عمل میں جاری کئے جانے والے بیانات جلتی پر تیل چھڑکنے کے مترادف ہیں.ہمیں ٹھنڈے دماغ سے غور کرنا ہوگا کیوں کہ غصہ اور تصادم کسی سیاسی مسئلے کا حل نہیں ہے جب کہ یہ امر انتہائی تشویش ناک ہے کہ ہماری حکومت میں ختم نبوت کا مسئلہ بنا اور اب ملک دشمنی کے الزامات لگ رہے ہیں۔چوہدری نثار نے کہا کہ سیاست دان کا کام اپنے اصولوں پر قائم رہ کر راستہ نکالنا ہے جب کہ اگر محاذ آرائی کا یہی سلسلہ جاری رہا تو صرف پارٹی کو ہی نہیں بلکہ ملک کو شدید نقصان کا اندیشہ ہے اور اگر ہر مسلم لیگی نے اپنا لائحہ عمل صحیح کرنے میں کردارادا نہ کیا تو اس سے پارٹی کو ناقابلِ تلافی نقصان پہنچنے کا خدشہ ہے۔
