سری نگر(ویب نیوز) بھارتی فوج کی ریاستی دہشتگردی، فائرنگ کرکے 4 نہتے کشمیریوں کو شہید کردیا۔کے ایم ایس کے مطابق قابض فوج کی مقبوضہ وادی میں کشمیریوں کے خلاف ظلم و ستم کا سلسلہ برقرار ہے اور تازہ واقعے میں فائرنگ کرکے 4 نوجوانوں کو شہید کردیا۔ بھارتی فوج نے ضلع پلواما میں محاصرے کے دوران چادر اور چار دیواری کو پامال کرتے ہوئے زبردستی گھروں میں گھس کرتلاشی لی اور اس دوران 4 نوجوانوں کو گولیاں مار کرشہید کردیا۔بھارتی فوج کے ان اقدامات کے خلاف اہل علاقہ محاصرہ توڑ کر سڑکوں پر نکل آئے اور احتجاج کرتے ہوئے قابض فوج کے خلاف اور آزادی کے حق میں نعرے لگائے۔مظاہرین کو منتشر کرنے کے لیے بھارتی فوج نے آنسو گیس کی شیلنگ کی اور ربڑ کی گولیاں چلائیں۔ بھارتی میڈیا کے مطابق ترال کے علاقے میں مسلح افراد کی فائرنگ سے ایک پولیس آفیسر اور فوجی اہلکار ہلاک ہوگیا۔
