گھوٹکی(ایس این این)چیئرمین پیپلزپارٹی بلاول بھٹوزرداری نے کہا ہے کہ پیپلز پارٹی روٹی کپڑا اور مکان کی سیاست پر گامزن ہے اورہمارے حریف امیروں کے قرضے معاف کرتے اور کرواتے ہیں۔گھوٹکی میں ایک تقریب سے خطاب کرتے ہوئے انہوں نے کہا کہ ذوالفقار علی بھٹو نے وڈیروں، زمینداروں سے زمین چھین کرغریبوں میں بانٹ دی ۔ پیپلزپارٹی آج بھی اسی پالیسی پر گامزن ہے اورغریبوں کی سیاست کرتی ہے۔بینظیر انکم سپورٹ پروگرام شروع کیا تاکہ خواتین کو حقوق مل سکیں۔ سندھ حکومت غربت مٹا اسکیم چلارہی ہے۔ مخالفین امیروں کی سیاست کرتے ہیں۔ امیروں کے قرضے معاف کراتے ہیں۔ اب یہ لوگ پی آئی اے اور اسٹیل مل اپنے دوستوں کوتحفے میں دے رہے ہیں۔بلاول نے کہا کہ عمران خان کو سیاسی شخص نہیں سمجھتا۔ ان کی سیاست عجیب ہے صبح ایک بات اور رات میں دوسری بات کرتے ہیں۔پہلے کرپشن کے خلاف بات کرتے ہیں پھر سندھ کے جس وزیراعلی کو کرپشن پر نکالا گیا وہی شخص عمران خان کے ساتھ گھوم رہا ہے۔بلاول کا کہنا تھا کہ سینیٹ انتخابات میں ہمیں ووٹ دے کر اس سے انکار کرنا عمران خان کے کھوکھلے نظریے کی عکاسی ہے. عمران خان رات کو کچھ کہتے ہیں اور دن میں کچھ اور. ان کی باتوںپر اعتبارکرنا فضول ہے.
