نواز شریف کو رعایت دینا ملک سے غداری کے مترادف ہے: طاہر القادری

لاہور: عوامی تحریک کے سربراہ طاہرالقادری نے کہا ہے کہ نوازشریف کو رعایت دینا آئین، عدلیہ کی کھلی توہین اور ملک سے غداری ہوگی۔
پارٹی کی سینٹرل کور کمیٹی کے ممبران سے ٹیلی فون پر گفتگو کرتے ہوئے انہوں نے کہا کہ نواز، شہباز دونوں قومی لٹیرے ہیں، معاشی دہشت گرد کی جگہ قاتل اعظم کو لایا گیا تو بحران خونی انقلاب کی شکل اختیار کرے گا، ادارے گلے، سڑے اور کرپشن زدہ متعفن نظام کے بجائے پاکستان کو بچانے کی فکر کریں، سپریم کورٹ کی طرف سے جھوٹا ثابت ہونے والے شخص کو پارٹی صدر بناکر پوری ن لیگ نے قوم کو یہ واضح پیغام دیا ہے کہ ہم جھوٹ،کرپشن اور لوٹ مار کے حامی ہیں اور ہمارے نزدیک سپریم کورٹ کے فیصلوں، آئین، قانون، جمہوری اخلاقیات کی کوئی حیثیت نہیں۔
سربراہ عوامی تحریک نے کہا کہ نوازشریف عادی بھگوڑا ہے، یہ اپنا ساز و سامان بیرون ملک شفٹ کرچکے ہیں،ان کا پاکستان میں اقتدارکے علاوہ کچھ بھی نہیں ہے، جب تک خائن کی باقیات اقتدار میں ہیں یہ آتا جاتا نظر آتا رہے گا، جب یہ امید بھی ٹوٹ گئی تو پھر فیصلے آنے سے پہلے ہی بھاگ جائے گا، فرد جرم کا ہر حرف سچ پر مبنی ہے اور جو کرپشن اب تک سامنے آئی اس کی حیثیت سمندر کے ایک قطرے جیسی ہے، ان کے بیشتر اثاثے اور اکاؤنٹس ابھی پردہ راز میں ہیں جب کہ لوٹی گئی دولت واپس لانا احتساب کے اداروں کی اصل آزمائش ہے۔