صومالیہ کے دارالحکومت میں خودکش حملہ، 276 افراد ہلاک

موغا دیشو : صومالیہ کے دارالحکومت موغادیشو میں خودکش حملے میں ہلاکتوں کی تعداد276 تک پہنچ گئی ہے، حکام کے مطابق ٹرک کے ذریعے ہونے والے خودکش حملے میں 300سے زائد شہری زخمی بھی ہوئے۔ تاہم کسی گروپ کی جانب سے خودکش حملے کی ذمہ داری قبول نہیں کی گئی۔
غیر ملکی خبر رساں ایجنسی کی جانب سے جاری رپورٹ کے مطابق صومالیہ کے دارالحکومت موغادیشو میں سڑک کے ذریعے خود کش حملے میں ہلاک افراد کی تعداد 267 تک جا پہنچی ہے، جب کہ حملے میں تین سو سے زائد شہری زخمی بھی ہوئے۔
عینی شاہدین کے مطابق ہلاک ہونے والے بیشتر افراد بسوں میں سوار تھے۔ صومالی وزیر اطلاعات عبدالرحمٰن یاریسو نے حملے کی مذمت کرتے ہوئے اس کی ذمہ داری الشباب نامی عسکری گروپ پر عائد کی ہے، تاہم کسی گروپ کی جانب سے ذمہ داری قبول نہیں کی گئی ہے۔
حکام کے مطابق ہلاک شدگان کی حتمی تعداد کا تعین ابھی نہیں کیا جا سکتا۔ حملہ بارود سے بھرے ہوئے ٹرک سے کیا گیا، حملہ شہر کی مصروف چوک پر ہوا، جس کے گرد متعدد ہوٹل، ریسٹورنٹ، دفاتر اور کاروباری عمارتیں قائم ہیں۔ حملے سے چوک کے گرد واقع کئی قریبی عمارتیں منہدم ہوگئیں، جس میں مشہور سفاری ہوٹل بھی شامل ہے۔ گری ہوئی عمارتوں کا ملبہ ہٹانے کا سلسلہ ہفتے کی شام سے جاری ہے۔خیال کیا جا رہا ہے کہ عمارتوں کے ملبے کے نیچے سے مزید انسانی لاشیں ہو سکتی ہیں۔ موغادیشو کے سکیورٹی اور طبی ذرائع نے تریپن افراد کے ہلاک ہونے کی تصدیق کر دی ہے۔ اسپتال ذرائع کے مطابق کئی زخمیوں کی حالت تشویشناک ہے۔
حملے میں زیادہ تر ہلاک ہونے والے عام شہری ہیں۔ حملے کے بعد تباہی و بربادی کے علاوہ ایک بہت بڑے علاقے میں انسانی اجزاء اور خون بکھرا ہوا تھا۔ بارود سے بھرے ہوئے ٹرک سے کیا گیا خود کش حملہ اتنا شدید تھا کہ دور دور تک کی عمارتوں کے دروازے اور کھڑکیاں ٹوٹ گئے تھے