دوسرا کرکٹ ٹیسٹ میں پاکستان کو شکست، سری لنکا کا کلین سویپ

دوبئی: پاکستان اور سری لنکا کے درمیان جاری دوبئی ٹیسٹ میں قومی کرکٹ ٹیم کو لنکن ٹیم نے68رنز سے شکست دے کر سیریز دو صفر سے جیت لی۔سری لنکا کے 317 رنز کے ہدف کے تعاقب میں پاکستان کی پوری ٹیم 248 رنز بنا کر آؤٹ ہوگئی، آج آؤٹ ہونے والے پہلے کھلاڑی سرفراز احمد تھے جو کہ 68 رنز بنا کر پریرا کا شکار ہوئے، ان کے بعد آنے والے کھلاڑی محمد عامر بھی 4 رنزبنا کر پریرا کی گیند پر آؤٹ ہوگئے، یاسر شاہ بھی زیادہ دیر تک اسد شفیق کا ساتھ نہ دے سکے اور 5 رنزبنا کرہیراتھ کا شکار ہوگئے، 244 کے مجموعی اسکور پر اسد شفیق بھی ہمت ہار بیٹھے اور 112 رنزبنا کر لکمل کا شکار ہوگئے ،جب کہ پاکستان کے آخری آؤٹ ہونے والے کھلاڑی وہاب ریاض تھے جو کہ ایک رنز بنا کر ہیراتھ کو وکٹ تھما بیٹھے۔
سری لنکا کی جانب سے پریرا نے 5 شکار کیئے جب کہ ہیراتھ نے 2، لکمل ،گماگے اورفرنینڈو نے ایک ،ایک وکٹ حاصل کی،سری لنکن بلے باز دیموتھ کرونارتنے کو بہترین کارکردگی پر مین آف دی میچ اور سیریز کا بہترین کھلاڑی قراردیا گیا۔واضح رہے کہ متحدہ عرب امارات میں پاکستان کو ٹیسٹ سیریز میں یہ پہلی شکست ہے۔