مسلمانوں کی نسل کشی کے نتائج خطرناک ہوں گے: اقوام متحدہ

نیویارک:اقوام متحدہ کے سیکریٹری جنرل نے کہا ہے کہ میانمار کی رہنما آنگ سان سوچی کے پاس روہنگیا مسلمانوں کے خلاف فوجی آپریشن روکنے کا آخری موقع ہے۔برطانوی میڈیا کو انٹرویو میں اقوام متحدہ کے سیکریٹری جنرل نے کہا کہ سوچی نے فی الفور آپریشن نہ روکا تو خطرناک نتائج جنم لے سکتے ہیں۔ذرائع کے مطابق سوچی قوم سے خطاب کریں گی جس میں ان کے پاس فوجی آپریشن روکنے کا آخری موقع ہے۔اگر میانمار حکومت نے حالات کو نہ سنبھالا تو انتہائی خوفناک سانحہ رونما ہوگا۔اقوام متحدہ کے سیکریٹری جنرل نے میانمار پر زور دیا کہ روہنگیا مسلمانوں کو واپس آنے کی اجازت دی جائے۔ انہوں نے کہا کہ یہ بات واضح ہے کہ میانمار میں اصل طاقت فوج کے پاس ہے۔ریاست راکھین میں اسی کے دباؤ پر یہ سب کچھ ہورہا ہے۔ دریں اثناء انسانی حقوق کی تنظیم ہیومن رائٹس واچ کی نئی رپورٹ میں کہا گیا کہ میانمار کی فوج روہنگیا مسلمانوں کی نسل کشی کی مہم چلائی رہی ہے اور اس نے گاؤں کے گاؤں جلا کر راکھ کردیے ہیں۔