ساہیوال (ایس این این)پنجاب میں کورونا کی بڑھتی ہوئی صورت حال کے پیش نظر3حکومت پنجاب نے ملتان، لاہور، گوجرانوالا، فیصل آباد، گجرات، راولپنڈی اور سیالکوٹ میں تمام نجی و سرکاری تعلیمی ادارے 2 ہفتوں کے لیے بند کرنے کا فیصلہ کیا ہے۔ ان تعطیلات کو بہار کی تعطیلات سے منسوب کیا گیا ہے۔اسلام آباد میں نیشنل کمانڈ اینڈ کنٹرول سینٹر کے اجلاس کے بعد وفاقی وزیر تعلیم شفقت محمود نے پنجاب کے 7 اضلاع میں تعلیمی اداروں کی عارضی بندش کا فیصلہ سنایا. اس موقع پر ان کا کہنا تھا کہ سندھ اور بلوچستان میں حالات تقریباً ٹھیک ہیں لیکن پنجاب، خیبرپختونخوا، آزاد کشمیر میں مسائل نظر آئے ہیں، سندھ اور بلوچستان میں 50 فیصد بچے اسکول آئیں گے، اسلام آباد ، فیصل آباد، گوجرانوالہ، لاہور، گجرات، ملتان، راولپنڈی، سیالکوٹ اور پشاور میں تعلیمی ادارے 15 مارچ بروز پیر 2 ہفتوں کے لیے بند کردیئے گئے ہیں، تمام تعلیمی ادارے 28 مارچ کو دوبارہ کھلیں گے۔ جن اداروں میں امتحانات ہورہے ہیں وہ جاری رہیں گے۔
این سی او سی کے اجلاس میں اِن ڈور شادی تقریبات اور کھانوں کی اجازت واپس لینے کا فیصلہ کیا گیا ہے کہ آؤٹ ڈور کھانوں اور ٹیک اوے کی سہولت میسر رہے گی، بیرونی اجتماعات کورونا ایس او پیز کے سخت نفاذ کے ساتھ زیادہ سے زیادہ 300 افراد تک محدود رہیں گے۔ اس کے علاوہ 15 مارچ سے سینما گھروں اور مزارات کھولنے کا فیصلہ بھی واپس لے لیا گیا ہے۔
