ساہیوال (ایس این این ) صوبائی وزیر سوشل ویلفیئر چوہدری فیصل مشتاق کاساہیوال میں سوشل ویلفیئر کے مختلف اداروں کا دورہ،انچارج اولڈ ایج ہوم محمد رفیق چوہدری کی بہتر خدمات کے اعتراف میں تعریفی سند اور 10ہزار روپے نقد انعام کا اعلان۔ تفصیلات کے مطابق صوبائی وزیر سوشل ویلفیئر اینڈ بیت المال پنجاب نے سوشل ویلفیئر کے مختلف اداروں کا دورہ کیا جن میں صنعت زار،دارالامان اور اولڈ ایج ہوم شامل ہیں۔صوبائی وزیر نے صنعت زار ساہیوال کو اپنی جیب سے 22سلائی مشینیں،2پیکو مشینیں اور ایک ایئر کولر دینے کا اعلان کیا اور صنعت زار میں طالبات کو دی جانے والی سہولتوں پر اطمینان کا اظہار کرتے ہوئے انہیں مزید بہتر بنانے کی ہدایت کی اور طالبات کو صنعت زار سے متعلقہ مسائل جلد حل کروانے کی بھی یقین دہانی کروائی۔اولڈ ایج ہوم کے دورہ کے دوران بہترین انتظامات اور رہائش پذیر بزرگ مرد اور خواتین سے بات چیت کے دوران انچارج چوہدری محمد رفیق کی کارکردگی کو سراہتے ہوئے 10ہزار روپے نقد انعام اور تعریفی سند دینے کا اعلان کیا۔اس موقع پر ڈائریکٹر سوشل ویلفیئر سید علمدار حسین اور ڈسٹرکٹ آفیسر پاپولیشن راؤ شاہد بھی ان کے ہمراہ تھے۔بعد ازاں صوبائی وزیر نے دارالامان کا بھی وزٹ کیا۔دورے کے دوران صوبائی وزیر نے اولڈ ایج ہوم اور دارالامان میں موجود خواتین و حضرات سے گھل مل گئے اور انکی خیریت اور مسائل دریافت کیے۔ انہوں نے اولڈ ایج ہوم میں نمازیوں کیلئے جگہ کی تنگی کا نوٹس لیتے ہوئے فوری وہاں مسجد تعمیر کرنے کی رپورٹ تیار کرنے کا بھی حکم دیا اور وعدہ کیا کہ وہ اس نیک کام میں اپنی جیب سے بھی حصہ ڈالیں گے۔صوبائی وزیر سوشل ویلفیئر چوہدری فیصل مشتاق نے دارالامان کے کمروں میں مناسب روشنی کا بندوبست نہ ہونے پر ناراضگی کا اظہار کرتے ہوئے ایڈمنسٹریٹر کو فوری طور پر لائٹیں لگوانے کی ہدایت کی۔
