میانوالی(ایس این این )تحریک انصاف کے چیئرمین عمران خان نے کہا ہے کہ نوازشریف اور آصف زرداری نے بدعنوانی کے تمام ریکارڈ توڑ دیے۔یہاں عوامی اجتماع سے خطاب کرتے ہوئے تحریک انصاف کے چیئرمین عمران خان کا کہنا تھا کہ میں عوام کو پاکستان کے مسائل سے آگاہ کرتا رہوںگا، کرپشن مافیا کی وجہ سے عوام کا پیسا چوری ہو کر بیرون ملک منتقل ہوجاتا ہے اور ملک خسارے میں چلا جاتا ہے، مسلم لیگ (ن) اور پیپلزپارٹی نے گزشتہ 10 سالوں میں کرپشن کے تمام ریکارڈ توڑدئیے ہیں۔عمران خان نے اپنے خطاب میں کہا کہ پاکستان کا سب سے بڑا مسئلہ بیرون ملک کا قرض ہے اور روپے کی قدر کم ہونے سے قوم پر قرضوں کا بوجھ مزید بڑھ گیا، 10 سال قبل ڈالر60 روپے کا تھا جو آج 130 روپے پرپہنچ گیا، ڈیڑھ ماہ میں ڈالر کے مقابلے میں روپے کی قدر20 روپے گری ہے جب کہ قرضوں کی واپسی کے لیے عوام پر ٹیکس لگے گا جس سے مہنگائی میں اضافہ ہوگا۔
چیئرمین پی ٹی آئی نے کہا کہ جب حکمران چوری کرتے ہیں تو باہر بیٹھے ان کے بچے اربوں پتی ہوجاتے ہیں، نوازشریف نے بھی ملک کے پیسے باہر بھجوائے اور بچے ارب پتی ہوگئے جب کہ گزشتہ پانچ سال میں مہنگی بجلی خریدکر عوام نے ان کی چوری کی قیمت ادا کی۔ انہوں نے عوام کو مخاطب کرتے ہوئے کہا کہ (ن) لیگ کے لوگ ووٹ مانگنے آئیں تو ان سے پوچھنا کہ وہ کوئی ایک چیز بتائیں جو انہوں نے ٹھیک کی ہو۔
